張馳豪 為新歌《一個人的生日歌》拍攝MV，歌路一向輕快嘅Aska呢次挑戰抒情歌，而佢喺MV嘅造型西裝骨骨，真係十足十漫畫嘅男管家一樣。不過Aska就話，自己其實係扮演一個咖啡店老闆，自己平時亦有沖開咖啡，所以喺拍攝場地見到有手沖咖啡設備時都忍唔住一展身手！
3月就係Aska嘅生日月，佢透露歌曲原定喺生日先推出，不過最後都係決定提早，佢亦好期待同粉絲一齊大合唱。Aska今年憑喺劇集《非常檢控觀》得到唔少好評，都好想知佢有冇入組拍新劇嘅計劃，Aska就話，大家有可能會喺今年睇到佢有份演出嘅《飛常日誌II》喇！
