陳瀅 同 蔡潔 現身影樓拍攝宣傳相，不過今次唔係喺劇集上面嘅合作，而係突破孖住開騷。兩位女神喺鏡頭前不論係意態撩人嘅甫士，定係嬉戲互打嘅玩樂感覺同樣默契十足。
佢哋都好期待今次嘅合作，因為以前雖然有同劇經驗，但甚少對手戲，估唔到深度合作竟然係一齊開騷。Jacky話有別於劇集角色，大家今次會喺騷上見到好不一樣嘅佢哋，Jeannie就話自己完全冇做騷經驗，今次係一大挑戰。
兩位女神話收到開騷邀請時，經已一齊諗咗好多環節送驚喜畀觀眾，當中包括會玩遊戲、表演同傾偈，仲有嘉賓亮相，當問到可否預告嘉賓身份？Jeannie話佢都未知係邊位，Jacky就笑言可能係張櫈。
Jacky同Jeannie首度一齊開騷，問到佢哋有冇諗過組合名嘅時候，Jacky話佢發現自己同Jeannie英文名簡寫都係JC，所以組合名可以叫「JC2」。至於表演內容，Jacky就話準備咗歌單，希望可以唱出啲故事畀大家聽，但跳舞就唔係佢負責，身邊嘅Jeannie話好彩有《卧底嬌娃》鍛練咗身手，應該冇問題。