薛家燕 周吉佩 羅啟豪 張與辰 胡定欣 詹天文 鍾柔美 馮熙燮 柯雨霏 胡子貝 谷婭溦 泳兒 黃淑蔓等呢日現身團拜活動，大家一見到家燕姐就齊齊請恭賀說話逗利是，沾沾喜氣希望馬年行好運。
家燕姐就話本身諗住帶三百封左右嘅利是就夠，點知轉眼間就已經派晒，令到佢急急腳叫外傭姐姐返屋企幫佢再拎多啲利是出嚟，家燕姐話唔少人都同佢講，舊年收完佢封利是之後都相當順利，更有人將佢派嘅利是keep起，今起再拎返出嚟畀佢睇，以示自己有好好珍藏，氹得家燕姐相當開心，亦令佢覺得值得再派。
天生福相嘅家燕姐，表示自己唔只接到騷，仲事事順利興旺，所以佢覺得同大家分享一下係好事，佢又指李大師曾經同佢講，利是越派得多，收入就自然多，所以佢先咁急叫外傭姐姐返去拎利是。
中聲家族感情向來和睦，但近日有報道指吉吉、啟豪、與辰要爭做公司一哥，三位對傳聞都得啖笑。吉吉話佢哋內部氣氛相當和氣，經常都會一齊玩，大家各自都有好多工作，但每次聚埋一齊都會談天說地飲飲食食，吉吉仲話佢哋內部非常開心，同時自己亦好想與辰可以做一哥，吉吉講完之後，身邊嘅與辰就即時耍手擰頭話唔要，仲將一哥呢個稱號拋畀另一邊嘅羅啟豪。
與辰話透過《中年好聲音》呢個節目，可以將所有知音人都group埋一齊係一件好事。羅啟豪就話佢哋每個人有唔同嘅性格同風格，佢認為樂壇係可以百花齊放嘅。
成為人妻冇耐嘅定欣，今年第一次派雙封利是，開心之餘佢話派利是時都畀一個問題考起，就係遇到比自己年長嘅未婚人士，到底要唔要派利是？定欣話為咗呢個問題，自己專登上網搵過，亦因此問過A.I。至於問到佢生小朋友嘅問題，定欣就話同老公嘅事業心都好重，仲有好多嘢想做，所以暫時順其自然喇。
