黃凱芹 即將舉行音樂會，近期密鑼緊鼓備戰，呢日進行綵排時見佢狀態大勇，獻唱經典金曲《雨中的戀人們》時，表現如同開騷一樣，無論歌喉同台型都十足，體態方面亦保持得唔錯，相當專業。
Chris更謙稱抵達現場講唔夠廿句說話就話要唱歌，如有甩漏請大家包容。另一方面Chris為咗開騷亦努力Keep fit，跟住網上片段做運動，每節做足60分鐘，效果理想。
Chris入行40周年特別創作咗新歌紀錄入行經過，認為要搵埋一班共同成長嘅好友一齊演繹更值得紀念。於是膽粗粗邀請好友，最初都有啲困難，當佢打算擱置計劃時，幾位嘉賓又突然可以出席，包括周慧敏、阮兆祥、余劍明以及鄭丹瑞等，幾位都係Chris從事廣播界時嘅好友，佢都好期待呢幕難忘回憶。
今次開騷Chris會採用三面台，平日經常踩台嘅佢竟然最難克服嘅係高度，並笑指自己有畏高，所以身高去到現時高度就叫停，希望屆時喺台上唔會腳震震。