資深綠葉 游飈 2月24號晚因病離世，終年57歲。由於消息突然，唔少昔日拍檔都深感惋惜。
游飈生前好友黃文標透露，2月12號游飈喺辦公室見客期間，突然覺得身體不適伏喺枱上，並要求佢幫手叫救護車。游飈送院前經已陷入半昏迷狀態，送院後證實係腦出血，要喺頭骨開窿減低壓力。
第二日仍然處於昏迷狀態嘅游飈因為顱壓仍然偏高，需要開顱骨，可惜病情未有好轉，直至2月24號晚，佢喺家人陪伴下安詳離世，遺下太太以及女兒。
一生對演藝有濃厚興趣嘅游飈，15歲中三畢業後就開始做臨時同特約演員展開演藝事業，佢1990年畢業於藝員訓練班正式加入TVB。游飈一生參演過百部劇集以及唔少綜藝節目，多數飾演小角色，更被外界稱為「御用爛仔」。
無論角色戲份多少，游飈都用心演繹，亦獲觀眾欣賞，喺《大時代》劇中飾演報紙檔員工教劉松仁疊報紙一幕令人印象深刻，另外佢喺《搜神傳》中以直腸直肚方式飾演「杜三」一角，更成為代表作之一。
游飈喺2012年決定放低幕前工作轉戰商界，不過醉心演藝工作嘅佢，亦有參與配音工作。游飈喺年多前接受「香港演藝人協會」專訪，曾經提到若果生命有限，仍然會為事業努力奮鬥，料不到事隔唔夠年半，就突然因病離世。
