方力申（Alex）與葉萱（Maple）去年12月喜迎愛女Isla出世，小方過去一年結咗婚，仲生咗個女，跟愛女相處近三個月，小方覺得身份轉變，各種計劃、擔心不斷湧現，明白家庭係最重要，「愛家」更係佢生活嘅重心，所以阿女Isla叫方愛嘉。
小方做咗人夫兼人父，感受真係多到爆，佢話如果人生係一場遊戲，單身嗰陣覺得自己幾好，工作穩定、有過啲成績，自己同父母健健康康，呢個遊戲玩得幾好，後嚟佢同太太結婚，發現難咗好幾級，「愛情唔係淨係得個講字，真係要行動，仲要一齊維繫感情」，實踐「一生一世」嘅承諾。
直到阿女出生之後，小方感覺就更加強烈，明白養小朋友真係有「養兒一百歲長憂九十九」，佢同太太照顧女兒方面，各種計劃、擔心不斷湧現，小方覺得未來呢個旅程係一定更加刺激，「心入面緊張得來，又充滿期待」。小方覺得每個人都有唔同選擇去過人生，「單身就係將『自己』活出極致，結婚生小朋友，就係將『我』變成『我們』。 我個女Isla叫方愛嘉，我哋係先改英文名，然後再改中文名。揀「愛」字係因為我屋企房間門口有兩幅書法分別係『愛』同『家』」。
小方認為家庭係最重要，「愛家」就係佢生活嘅重心，而且「愛」嘅普通話發音又可以同Isla呼應，解釋用「嘉」字係老友陳定幫師傅幫佢哋改嘅，發音亦係同「家」字一樣。 小方不忘再次講計劃生第二胎，「講到我哋嘅家庭Family，F代表Fong，A係Alex，M係Maple，I係Isla，L係未來嘅寶寶，Y係Yip，既然中英文意思都咁夾，就乾脆叫佢愛嘉啦，Isla 愛嘉，爸爸今日嘅願望就係希望妳能夠一生平安、健康、快樂！（其他就隨緣啦）」。
