TVB Plus新節目《醫美直擊首爾篇》首播後引起熱話，有「御用師奶」之稱嘅藝人黃梓瑋（Jenny）亦係其中一位參與節目嘅「測試員」。黃梓瑋喺節目揚言要搵返「人生第二春」，藉呢次機會回到十年前黃金期兼擺脫「肥師奶」形象。
Jenny喺節目表示自己自細注重外表，不過家庭並非富裕，仲有兩個細佬要照顧，婚後要以家庭為重，唔捨得花錢喺自己身上，只係喺香港做過基本美容項目同微創吊線雙眼皮手術，呢次佢喺節目大膽決定要做開刀割雙眼皮手術。
Jenny入手術室割雙眼皮前心情沉重，仲抱住主持何依婷喊，經過何依婷安慰後平伏心情。Jenny此行亦接受透明質酸填充注射，一口氣喺塊臉打10支針，為咗靚豁出去。 Jenny近年積極經營社交平台，經過一番改造，佢帶住靚樣拍片同網民拜年。從片中可見，Jenny而家變得五官立體，下頷線明顯，雙眼圓大有神，個樣後生咗，仲有人覺得佢同90年代女神關秀媚撞樣添！
《醫美直擊 首爾篇》逢周一、五晚9點半、周二、四晚9點35分於TVB Plus (82台)播映。
