香港首位華人女騎師江碧蕙（Sherie），正式「入五」，喺初九呢日，Sherie就舉行咗慶祝活動，好朋友韋綺姍（Rita）、栢天男、胡孟青，仲有可嵐同佢嘅大仔等出席，回顧呢五十年嘅人生，一向好硬淨嘅Sherie一度感觸落淚。
Sherie話做運動員，需要有堅毅嘅精神，經常關關難過關關過，人生總會有高低，自己喺低谷時，感謝在座嘅每一位企出嚟支持，亦感激每位賓客花咗好多心思為佢慶祝生日。
呢個農曆年不停開show嘅Rita老師，就算幾忙都要參與Sherie嘅生日會，Rita老師同Sherie情如姊妹，成日都會相聚，又會去Sherie屋企 BBQ，問到Rita老師有冇叫Sherie教佢騎馬？Rita老師即刻耍手兼擰頭：「騎馬我就唔敢啦，因為我試過被馬欺負，所以我好驚同有陰影。」
講開騎馬，原來可嵐同佢大仔曾經跟過Sherie學騎馬，當年可嵐學緊騎馬無耐，就有咗小朋友，於是佢就將剩下嘅課堂交畀阿仔學，而家阿仔雖然冇再學，但呢日可嵐特登帶埋阿仔一齊嚟參加教練嘅生日會呀。
