今個月 28號就係 區明妙Miumiu 嘅25歲生日，呢日Miumiu同佢嘅粉絲「妙妙貓」開生日會慶祝，亦係Miumiu首度搞見面會，見佢對一眾「妙妙貓」有求必應，逐一同Fans合照交流，又獻唱《主角光環》唱出自己心聲，更即場接受K-pop舞挑戰，大派心心展現嬌俏可愛一面，最初Miumiu都有啲怕醜，經一輪熱身後就似模似樣。
Miumiu透露首次同粉絲聚會，準備咗好多環節同大家分享，心情特別緊張，令佢最感動係有來自澳門、內地等趕來嘅粉絲專誠參與，正值新年都咁多人支持，Miumiu無言感激，更分享踏入馬年大計，稍後將會推出寫真集，希望新一年工作多啲嚟、密啲手。
Miumiu對演戲亦有期待，盼望未來可以飾演一啲同自己反差大嘅角色，唔一定再做乖乖女，可以突破界限。
