隨住電腦特效成熟，唔少電影都棄用實境拍攝，不過作為演員，能夠置身於實境中演出，投入感自然會倍增。方中信、呂良偉、張繼聰、安志杰 同 陳家樂 主演嘅動作電影中，其中一幕槍戰戲份，導演吳家偉決定以實境拍攝，仲選址喺訪港遊客必到嘅尖沙咀加連威老道，將平日熙來攘往嘅購物熱點，變成槍林彈雨嘅槍戰現場。
喺大銀幕呈現嘅真槍、真爆破，除咗令觀眾睇得入神，喺戲中參演嘅演員亦同樣興奮，戲中飾演衝鋒隊隊員嘅陳家樂，諗返喺鬧市拍槍戰嘅一幕依然雀躍：「槍戰嘅時候咁多人喺街度圍觀，令到我腎上腺數飆高，叫啲街坊『唔好睇呀！有危險呀！』咁樣做都好自然。」至於飾演在逃要犯阮卓龍嘅張繼聰就話：「平時肯定冇機會咁樣做，做演員都唔係成日有機會，緊張得嚟會有少少暗爽！」
今次喺戲中飾演衝鋒隊組長嘅方中信，雖然見慣大場面，但佢都話：「而家拍戲嘅CG真係好勁，但係點都唔及真實嘅開槍同埋真實嘅爆破，咁真實。」甚至連見慣荷里活特技效果嘅安志杰，都忍唔住對製作規模驚嘆。
