32歲譚嘉儀早喺2012年入行做模特兒，與何依婷、蔡嘉欣、陳詩欣非常老友，佢與圈外老公結婚7年，近日於社交平台宣布陀雙胞胎，迎嚟「一個身體，三個心跳」嘅生命奇蹟，譚嘉儀喺社交平台坦言經歷試管嬰兒（IVF）身心煎熬。
譚嘉儀與老公結婚7年，一直享受浪漫二人世界，後嚟決定生B，卻經歷懷孕辛酸過程，經過無數次藥物促排卵、取卵、體外受精、胚胎培養，並進行移植手術，每個月期待變成每個月失望，兩人做完詳細身體檢查，醫生證實佢哋非常健康，但緣份就係遲遲未到，最終選擇接受試管嬰兒療程。
譚嘉儀喺肚皮施打排卵針，不幸出現試管嬰兒療程中常見嘅併發症，卵巢過度刺激症（OHSS）導致腹腔積滿腹水，身體承受極大痛苦。譚嘉儀喺植入胚胎嗰日，特意帶糖果去醫院，並一直重複祈求，希望「跟我回家」 ，佢終於等到兩個小生命降臨，頓時覺得一切努力都係值得！
