TVB一眾藝員曾展望GM、葉蒨文SophieYip、羅毓儀YukiLaw、游嘉欣KayanYau、劉頌鵬、周志康及陳懿德，呢日由財神安德尊率領向TVB合作夥伴拜年，一齊大派利是送祝福兼玩遊戲互動，場面熱鬧。
一眾藝員更趁住呢個機會落足嘴頭推銷自己長處，爭取更多工作機會，GM同Sophie呢對CP一唱一和，男嘅就話自己中英文名都好百搭，除咗展望未來，英文GM亦可以係Good Man、Good Machine、Good Map等，非常百搭。而Sophie亦接力推銷佢同男友一齊主持嘅節目《一馬當先行大運》，叫大家若果想搵人講嘢歡迎隨時聯絡佢哋。而德德就話自己玩得、食得、瞓得、乜都得，同GM一樣咁百搭。
大王一身財神打扮成為最受歡迎吉祥物，眾多人排隊搵佢集郵，但大王就好謙虛熱捧GM做接班人，大讚佢同女友Sophie好受客戶歡迎，一輪咀送上稱讚，最初GM嘗試同大王互笠高帽，最終口才不敵前輩，場面搞笑，隨後大王又率領佢哋向TVB娛樂新聞台送上祝福。
德德自從同羅天宇JoeyLaw傳出緋聞後，經常被追問感情狀況，大家都期待佢有好消息公布，德德坦承今年特別多人追問佢幾時結婚，但佢就話唔急，想逗多幾年利是先。
