關禮傑喺TVB熱播劇《臥底嬌娃》飾演慈善商人劉彪，與老婆「卡邦妮」邵美琪喺劇中非常恩愛，現實中嘅關禮傑，入行多年近乎零緋聞，1990年與梁安娜（Anna）結婚後，更被封為圈中好老公，二人一直恩愛如昔，今年為長女關楓馨與「未來女婿」徐灝晴（Hugo）慶祝生日，關禮傑罕有叫阿女去曾有「求婚勝地」之稱嘅跑馬地Amigo餐廳食生日飯，原來呢度仲係以前關禮傑帶老婆拍拖撐枱腳嘅地方，充滿兩公婆拍拖時嘅浪漫回憶。
myTV SUPER收睇熱播劇《臥底嬌娃》
關楓馨笑指平時阿爸關禮傑咩都冇所謂，今年竟然好主動話要求去呢間餐廳食飯，阿女見佢難得咁有idea就一口答應，由太太Anna負責訂位同安排蛋糕。
關楓馨一入到餐廳，已聽到第一句係「關生好耐冇見」，又指呢度嘅環境同以前依然一樣，有roaming band點歌唱、做咗超過20年嘅waiters，仲會送玫瑰花畀女仔🌹，令關楓馨完全feel到爸爸媽咪對呢度嘅情懷，心裏面百感交集，頓時覺得好感動。
關楓馨認為爸爸平時靜靜，對家人卻好浪漫👩🏻❤️👨🏻，阿女好開心一家人陪佢慶祝生日，同時覺得最值得慶祝嘅係有一對咁錫自己嘅父母，「Rich in life because I have the best family anyone could ever ask for 🥰（因為我擁有世界上最好的家庭，所以我的生活好富有）」。
該餐廳原址位於銅鑼灣波斯富街，後嚟於1976年搬到跑馬地現址，買下整幢樓高兩層嘅建築物，走西班牙式風格，上層主用餐區、下層酒廊以船艙為靈感，彷彿置身於古堡般，當年政商界名人、富豪闊太及明星飯聚熱點。
