陳健安悼亡父離開廿載 新歌加插爸爸昔日聲音

陳健安 早前喺演唱會首唱新歌《梨子》，而呢首歌係佢用嚟表達對經已離開咗20年爸爸嘅愛，佢話回想爸爸昔日往事，最深刻印象係爸爸批梨子皮，亦感覺到自己嘅價值觀同行為係來自爸爸，所以想用「梨子」做引子，同大家分享呢件事。

安仔為新歌推出MV，今次佢就棄用真人演繹，改為用一個更有溫度嘅方法製作，因為佢覺得以動畫表達，更能突出歌詞力量。另外又諗到如果能加入爸爸聲音會更有意思，於是佢就喺家族群組中詢問，最後喺家姐屋企搵到爸爸一啲片段，並喺兩、三日時間內，收錄喺歌曲尾段。