陳柏宇 日前推出集結早前多首情歌作品嘅全新專輯《BEST BALLADS OF 關於...情歌》，新專輯唔止以「情歌」作創作主軸，同時亦係佢以父親身份為兩位愛女準備嘅愛情教科書。早前Jason於新碟分享會同樂迷見面，演唱當中多首作品。
現場樂迷獲Jason同監製分享專輯製作過程中嘅小故事，Jason更首次演繹專輯中多首作品，其中新作〈過後〉係延續Jason 經典〈逸後〉創作而成，佢話：「驚你哋唔知呢兩首歌嘅連結，所以係特登用咗〈逸後〉經典嘅前奏做〈過後〉嘅『前前奏』。」之後佢又同作曲人Harry Kwan演繹另一作品〈一天〉。
當日活動前，Jason於社交平台公開請樂迷投選出希望佢演唱嘅side track 。當日即席獻唱高票當選嘅〈一千種戀愛〉，但音響就突然出現問題。最後Jason就於大家打拍子下，清唱，唱畢後佢仲笑言：「唱之前都話咗呢首歌有一千種唱法啦！」
參與活動嘅樂迷中，一位幸運兒得到由Jason親自準備嘅「禮物」，Jason更揭露禮物係佢親筆撰寫嘅一封手寫信，包含佢20年來對樂迷支持同愛護自己嘅感激：「正常情況下係冇辦法逐一多謝你哋，所以透過呢封信想親口多謝你嘅支持。」
Jason呢日仲公布，佢7月將舉行紅館演唱會，雖然未講明確實日期，不過佢就話：「唔係 7 月頭嗰五日，亦都唔係最尾嗰五日！」