陳松伶 相隔14年重臨香港舞台舉辦音樂會反應熱烈，今次仲由中聲人氣歌手 張與辰 擔任音樂總監，松松姐姐為咗開騷亦傾力籌備，又出動老公張鐸做魔鬼教練幫佢Keep fit，無論體態同外貎都堪稱凍齡美女。
松松姐姐星期六晚嘅音樂會頭場演出精彩，吸引眾多圈中好友包括洪欣、謝天華、關寶慧等捧場。松松姐姐更為觀眾送上一個大驚喜，邀請到同為兒童節目《閃電傳真機》第一代主持人嘅 譚玉瑛 同 麥長青 合體演出，後台更見到另一位主持人 黃智賢 一齊合照，畫面勾起童年回憶。大家齊齊重溫昔日譚玉瑛飾演「Auntie烏卒卒」同麥長青飾「矇查查」嘅小劇場。而當年松松姐姐曾推出多首兒歌，令人津津樂道必定記得當然就包括《烏卒卒》喇。
麥長青演出後上載多張合照感謝松松姐姐邀請，仲話烏卒卒同矇查查都好開心，現場就如舊同學聚會一樣，松松嘅演出非常精彩，大合唱環節全埸熱情投入……很喜歡她與老公的那一段，期待下次演出！而關寶慧亦大讚松松姐姐嘅新歌好聽，唱出自己嘅心路歷程，非常動聽。
