黃宗澤 喺年初舉行嘅《萬千星輝頒獎典禮2025》憑劇集《新聞女王2》Kingston一角，首奪雙料視帝，獲獎後佢接受我哋《星光路上》 潘盈慧 專訪，分享得獎感受同心路歴程。
Bosco喺頒獎禮當晚先後得到「大灣區最喜愛TVB男主角」及「最佳男主角」成為雙少視帝，由三哥苗僑偉手上領獎全程爆喊，Bosco解釋感動並非因為得獎，而係由三哥手上攞獎，因為三哥由細睇到佢大，所以當刻特別感動，自己都預計唔到會爆發出嚟。
Bosco指對獎項一直佛系，從來都唔太在意，雖然入行27年先迎來首個視帝名銜，但笑言唔會在意獎項遲或早，反而更擔心更年期來臨。
除咗演藝事業，Bosco入行前曾考慮過做時裝設計或者廚師，佢坦言前者嘅職業係受爸爸貪靚直接影響，而後者則因以前住沙角邨時，樓企下就係大排檔，由做暑期工開始就覺得煮食幾好玩，細細個已經對廚藝好有創意。至今Bosco廚男美譽並非浪得虛名，好多朋友都鍾意上去佢屋企開餐、飲湯，試吓佢手勢，發揮廚藝亦係Bocso最大娛樂之一。
訪問中Bosco又一同剖析出演奸角嘅劇集，包括《新聞女王2》、《幕後玩家》等嘅角色，笑言Kingston唔係奸，而係賤人。至於《幕後玩家》嘅角色既拋妻棄子，又出賣兄弟，更犯法，真係壞事做盡。
而講到同汪明荃拍攝《我的野蠻奶奶》，為Bosco帶來飛躍男演員獎，佢更因拍劇同阿姐結緣成為好友。得到阿姐痛錫，Bosco覺得一切都係緣份，好多人覺得阿姐好嚴肅，但佢會主動撩阿姐傾偈，深刻記得當時阿姐帶私伙衫拍劇，仲會叫佢同胡杏兒一齊揀衫，大家好好傾，又會一齊行街買衫，同阿姐嘅友好關係至今不變。