顏志恒 趁住新春佳節，相約一眾「Bens」團拜聚會，仲準備「撈起」同大家攞個好意頭。Benson除咗揮筆寫揮春，又派出寶貝仔表演加上自己獻唱，Benson話期待咗呢次聚會好耐，因為之前太忙冇時間見粉絲。
踏入馬年，Benson已經有唔少工作大計，當中就預告喺暑假期間，會聯同細仔一齊演出音樂劇，而大仔都有接受訓練中，若果屆時有足夠準備，就三父子一齊上陣。
今個農曆新年，Benson一家四口做咗一件未試過嘅事，就係去大埔林村擲寶碟。Benson話擲寶碟比想像中困難，自己要擲足幾次先成功，佢透露自己嘅新年願望首位係身體健康，其次係推出新歌同工作順利。
