今個星期《電影泉攻略》主播 王鎮泉 Jeoffrey 同觀眾介紹新鮮熱辣嘅影壇快訊。今次《影人Talk》就請嚟電影《雙囍》嘅男主角劉冠廷。
戲中劉冠廷與 余香凝Jennifer 飾演一對即將擺婚禮嘅新人，呢次係佢哋首次合作，劉冠廷話合作前佢哋只係喺《亞洲電影大獎》有過一面之緣，當時大家仲寒喧話希望將來有機會合作，但估唔到咁快就有呢個機會。
而講到同飾演佢外父嘅田啟文合作，劉冠廷就形容係夢想成真，因為佢話自細就睇對方嘅演出，劉冠廷仲分享自己喺拍攝現場，畀田雞嘅演技嚇到成身發震嘅經歷。
新片《雙囍》乍聽之下好似係一個荒謬嘅喜劇，劉冠廷話自己攞到劇本前，聽導演講解時，自己都以為係一個好瘋狂嘅故事，但佢話其實導演好巧妙將佢收藏喺一個大家都可以理解嘅故事中，但其實只要大家深入了解，就會理解重組家庭嘅小孩心情。劉冠廷指當初要體會呢類小孩嘅心情，自己喺導演身上拎到好棒嘅建議，佢又指作為演員可以幫助大家搵到一個情感抒發嘅出口，係一種使命。
現時育有一子嘅劉冠廷，自己喺演呢齣戲嘅同時，都畀自己一個提醒，因為戲中嘅男主角係長大後父母先有呢啲爭吵，而佢囝囝而家咁細個，未來佢哋會遇到更多需要彼此一起度過嘅時刻，真係要一齊好好守護。
另外，劉冠廷仲分享咗喺戲中一場推開門唱歌戲，佢指喺佢唱歌前，庹宗華已經將整齣戲嘅情緒推至高位，所以佢要好專注先可以keep到個情緒，劉冠廷仲講笑話如果自己現實中遇到，應該會唔敢開門或者逃跑喇。