陳松伶 時隔多年再於香港舉行嘅演唱會圓滿落幕，多位圈中前輩好似胡楓、薛家燕、李琳琳、羅家英、蔡和平伉儷、洪欣，以及擔任音樂總監嘅張與辰媽媽同姐姐都有捧場。而大批老友亦送花籃祝賀演出成功。加上歌迷熱情打氣，仲喺場館大堂精心佈置「打卡區」，非常貼心心。
演唱會開始前大屏幕就先播出以松松過往影視作品為主題嘅短片，重溫佢入行40年嘅精彩時刻。之後主角松松以一身紅衣現身，以當年參加比賽嘅歌曲《零時十分》揭開序幕，之後以《財神到》、《祝福你》同《歡樂年年》獻唱連串賀年Medley，又同舞蹈員到台下派利是。
松松之後感慨話：「開場條片勾起好多回憶，時間過得好快。1985年我夢想成真，參加歌唱比賽入行成為歌手；今年2026年，可以再次喺香港開演唱會，我覺得係再一次夢境成真。」隨後就接連演繹多首劇集歌曲，好似《月兒彎彎照九州》、《緣份》同《愛你不是渾閒事》，之後以佢首次作曲作詞嘅《笑看風雲》插曲《憶》完成首部分演出。
松松換裝後再度登場，於一眾舞蹈員伴舞下演繹《夜上海》、《永遠的微笑》、《月圓花好》同《天涯歌女》組成嘅Medley。之後就演唱多首兒歌Medley，包括《小時候》、《跳飛機》、《小白船》、《無盡的宇宙》同《烏卒卒》等。
而松松兒童節目年代嘅拍檔 譚玉瑛 同 麥長青 亦驚喜現身再度合體，同台大談當年趣事，勾起全場滿滿回憶。松松話：「籌備呢個演唱會時，我問咗好多朋友同歌迷最想聽咩歌，估唔到最多人揀嘅係《烏卒卒》！不如大家同我哋一齊再唱多次啦！今日好似同學會聚會，見返好多舊朋友，好開心。」
唱畢後松松笑問兩人：「你哋同我咁熟，知唔知我第一隻兒歌係邊首？」在兩人搞笑作答後，松松揭曉答案係《相聚一刻》，隨即三人同台合唱：「真係好開心今晚可以同譚玉瑛姐姐同麥包一齊唱歌傾計，唔係開演唱會都未必有咁嘅機會！」
松松之後又講道：「今次演唱會除咗一班老朋友，仲令我認識咗好多新朋友，其中一位喺音樂上同我好夾，又有才華又年輕，幫我作曲編曲，仲兼任音樂總監，就係我嘅新細佬張與辰啦！」兩人隨即合唱《分分鐘需要你》同《Can’t Help Falling in Love》。松松仲話：「同你合作過就知你真係好忙，但又好勤力，好多謝你百忙之中花咁多時間同心機，幫我做咗好多編曲，又陪我練歌。」其後與辰就獻唱全新個人作品《獨居的儀式感》。松松再度換裝後同張與辰合唱《屋頂》。
之後松松再以《一顆真摯的心》、《溫馨不再 Sans Amour》、《原來只要為你活一天》同《有我便有你》串連成迷你音樂劇，松松老公張鐸更驚喜現身舞台一齊演出，「我逼我老公陪我跳呢part舞，佢明明手腳唔太協調都肯上台陪我。佢好忙，只係得好少時間排練，今朝先到香港同我踩台，做完騷就要飛返國內。我一直都覺得自己好幸運遇到佢。」
Encore環節松松化身勁歌舞后，跳唱《冰山大火》、《煞科》、《隆重登場》同《花花宇宙》。原本松松以全新作品《松伶》作為全晚最後一首歌，但大批觀眾場館燈亮後仍不肯離場，貼心嘅松松同與辰再返到台上，為大家獻唱《追》同《愛是永恆》，正式為全晚演唱會畫上圓滿句號。
