蔡卓妍新年孖男友歐遊兼見家長 透露奄尖Sa媽出奇地滿意另一半

蔡卓妍（阿Sa）年初大方認愛年輕10歲嘅健身教練新歡Elvis（林俊賢）後，整個人容光煥發，呢日與堪輿學家李丞責現身賀年活動，阿Sa最近孖男友同朋友一齊歐洲旅行，過年亦有向男友家人拜年，透露Sa媽幾滿意另一半。

阿Sa受訪時稱媽媽出奇地覺得OK嗰喎，皆因Sa媽個性比較奄尖，見家長後又冇乜嘢講，應該OK！問到見家長後係咪視對方為結婚對象，阿Sa坦言唔係玩玩吓嗰啲，好嘥時間㗎嘛！講到師傅話佢同男友幾夾，阿Sa就話佢哋有自己嘅節奏。

剛同男友度過首個情人節，阿Sa一臉甜笑兼面紅，同時讚男友情緒好穩定，就算被人跟蹤都適應緊！李丞責師傅就批阿Sa好事成雙，而今年娛樂圈好易有好多罵戰、強烈爭執等，希望新正頭都以和為貴。