方力申 梁芷珮 一齊現身一個活動，挑戰「最多人線上線下同時做開合跳」嘅健力士世界紀錄。小方最近宣布入紙紅館成功，終於可以展開紅館個唱嘅好消息，不過海報就被網民發現同尹光23年個唱海報撞款，更引起熱議。
小方解釋自己要為呢件事負全責，因為自己好鍾意粉紅色，連十幾歲為港出賽時嘅泳帽都係粉紅色，加上覺得粉紅同藍好襯，所以拍板決定用呢個設計，估唔到會撞海報。小方又話自己同尹光係乒乓波波友，經常約埋打波，光哥亦表示會全力支持自己。
小方入行至今25年，難得有呢個機會，佢都承諾會努力為歌迷準備最好嘅演出。不過小方而家有囡萬事足，佢自認需要克服一見到囡囡就會想望想攬嘅衝動，要平衡身分。
被問認唔認為囡囡「腳頭好」，一出世已經旺住爸爸，小方就即刻賣口乖歸功於老婆，多得老婆好識生，又解釋呢個就係「千金」意思，將福氣帶到大家身邊，自己亦感到好幸福。
而Christy主持嘅旅遊節目「潮什麼」系列向來大受觀眾歡迎，佢預告新一輯將會走到南美，唔只會走入亞馬遜，更會一個旅程經歷四季，所以好考體力，連執行李都係一件好花心思嘅事。
