57歲藝人黃梓瑋近日喺TVB Plus醫美旅遊節目《醫美直擊 首爾篇》公開整容血淚史，坦言早喺30年前已做鼻部整容手術，可惜隨住時間過去，後遺症開始浮現，多年嚟亦常被網民惡意攻擊，飽受極大心理壓力。myTV SUPER睇《醫美直擊 首爾篇》
資深演員黃梓瑋喺節目接受減齡醫美，佢坦言曾做鼻部整容，跟住後遺症開始浮現，出現矽膠縮小及歪斜等嚴重問題，加上當年主診醫生早已失聯，黃梓瑋透露：「個鼻（整容）都應該有30年前，初初出嚟靚嘅。但唔知原來到時到候要去修復，個醫生都搵唔到喇。之後後遺症開始出現，矽膠縮細、歪咗。」
黃梓瑋曾對整容失敗留下陰影，每次有新劇出街，即被網民批評「整容失敗」、「無嗰樣整嗰樣」及「醜人多八怪」，經常被網民針對，佢睇完當然唔開心，有過上次經歷，對整容亦有戒心，今次佢被安排接受「埋線」醫美，改善臉部輪廓，主持何依婷解釋埋線開口位係針窿咁大，打咗條線入去之後再進行提拉，效果冇拉皮手術咁明顯，勝在唔使開刀。
李在恩院長負責今次醫美療程，其有22年拉皮手術經驗，為黃梓瑋揀咗「神力拉提」嘅埋線，係傳統線嘅4倍拉力。院長表示因黃梓瑋年紀較大，總共要「打」14針先有效用。黃梓瑋喺每針穿過皮層時都忍唔住呼痛，療情後明顯見到其兩邊面頰立時提升緊緻咗。
《醫美直擊 首爾篇》逢周一、五晚9點半、周二、四晚9點35分於TVB Plus (82台)播映