TVB處境劇《愛·回家之開心速遞》一眾演員，喺元宵節齊齊著上傳統服飾，同大家一齊歡度佳，除咗猜燈謎之外，佢哋仲將心願寫喺天燈上，當中就有人寫「楊明思明結婚」，熊家都代表《愛‧回家》呢個大家庭向兩位催婚。
作為當事人嘅楊明同莊思明笑言，而家考慮緊喺11廠擺返幾圍先，亦好開心大家咁關心佢哋。今年係二人拍拖十周年，佢哋都話今年係一個好年，會朝結婚進發。講到係咪要留驚喜畀女友，楊明就話已經冇乜驚喜，因為自己買好戒指卻被人踢爆。
講到夫妻相處之道，劉丹就話趁呢個元宵節要同太太喺屋企浪漫一下，食返餐飯。至於單立文就自認日日都咁Sweet，因為係被老婆迫嘅！
劉洋喺啱啱過去嘅農曆新年就返咗東北過年，由於餃子太好食，自己又肥咗幾斤，認真要減一減。劉洋自爆嚟香港生活後，呢一年一共肥咗五十斤，所以一定要減。
至於張景淳就喺呢個新年冇啖好食，因為佢喺收爐前幾日感冒，結果喺收爐嗰日感冒菌入腸，成個新年都喺不停瞓覺中度過。
