林盛斌（Bob）呢日率領旗下主持團隊舉行春茗，新加盟嘅王海榛、劉晨芝向金牌媒人求姻緣，點知許紹雄已婚女兒許惠菁亦求埋一份，竟然話擇偶條件要心地善良同孝順，又避談目前婚姻狀況！
許惠菁受訪時話只係幫佢哋提阿Bob，又指應昌佑聽到王海榛同劉晨芝擇偶條件都擰晒頭，許惠菁好欣賞應昌佑嘅表情。問到許惠菁以事業為重，係咪同先生少見面咗，許惠菁話而家好多時間係陪家人，最好就係日日有嘢做。
許惠菁話跟丈夫各有各忙，目前專心工作。許惠菁喺2023年底跟拍拖7年嘅新加坡男友結婚，獲大批圈中人到賀，而TVB娛樂新聞台發現許惠菁已喺社交平台清空結婚相，就留低全家福，旋即惹起婚變疑雲！
應昌佑亦係新加盟去阿Bob旗下，阿Bob指二人相識多年，咁多年大家有聯繫，應昌佑喺近呢兩、三年收埋咗自己，家庭及個人都有新動向，阿Bob主動問對方有冇興趣出嚟做主持人，笑指唔係突然會捧紅應昌佑，或者叫佢做歌手咁，只係知應昌佑好喜歡運動，有時接到呢啲工作就可以搵對方去試，同時阿Bob仲提議訓練王鎮泉唱歌，大讚王鎮泉唱歌OK嘅。
