賀歲片 《夜王》元宵當晚舉行「開運元宵春茗」，導演 吳煒倫 同主角 黃子華 鄭秀文 ，聯同一眾主演 王丹妮 楊偉倫 盧鎮業 何啟華 楊偲泳 譚旻萱 李芯駖 林熙彤 蔡蕙琪 網上開Live，同大家一齊歡度元宵節，更即場宣布最新票房已突破7686萬，又邀講 蘇民峰 師傅妙論大家嘅馬年運程，師傅仲直指讚片名改得出色，票房勢必破億。
歡哥子華同V姐Sammi呢日同大家再見都非常興奮，子華話：「好耐冇見過班員工，今晚真係有東日春茗嘅氣氛！」Sammi亦指：「同埋大家一齊享受呢個美好嘅成果 ，真係好開心！」佢仲對票房衝破7600萬非常感恩：「好珍惜今次演出，我最開心嘅係觀眾感受到呢套電影所帶出嘅信息，睇完之後大家有共同話題、好多思考，亦都好值得翻睇，好幸運能夠參與一部咁好嘅電影！」
子華亦提到：「好似Sammi話，《夜王》引起各種嘅討論、關心，可以話係為呢個城市點著咗啲嘢，多咗啲活力朝氣，我覺得係一件幾開心嘅事！」除咗歡哥同V姐之外，其他角色個個有血有肉深入民心，Sammi有感而發話：「我俾咗子華一個綽號叫『燈塔』，佢唔單止自己發光，仲令側邊啲人都一齊發光 ，佢喺歷史裏面係好獨特嘅存在，當然今次有咁多出色嘅香港新演員，咁快就得到認同，梗係好到不得了，我覺得呢個『燈塔』嘅光實在太厲害！」子華就認同講到：「拍咗《飯戲攻心》同《毒舌大狀》，都有一班新演員廣為大家熟悉，甚至合作完攞最佳女主角，但更加重要係要有機會，所以希望容許我哋開多啲戲，大家多啲入場，令新人有更多機會俾大家睇到，咁就最開心！」
有網民要求若票房破億，希望子華演繹宣傳曲《星秀傳說》，而導演就透露《夜王》原聲大碟正籌備中，子華笑言：「聽到佢哋已經做緊（隻碟），完全知道係冇預我，唔好俾我搞散！」亦有網民期待子華同Sammi繼續合作，導演吳煒倫就驚爆想開拍喪屍片，子華笑稱樂意被咬：「我想像到俾喪屍咬嗰種反應，我會係做得好好，我一定會做！」
導演亦笑言：「首先未知道邊位係喪屍、邊個係人類，子華話想俾喪屍咬，但點知佢一嚟就可能係喪屍……其實所有演員次次都好合拍，希望之後再有新諗法，大家一呼百應又嚟玩多次！」
數《夜王》眾多角色之中，土地與太子峰討論度一直居高不下，阿卵坦言受寵若驚：「大家似乎好鍾意嗰啲對白、鞠躬，而家仲叫做『土地跳』，咁梗係開心啦！其實最開心導演好open俾我哋去玩，同子華哥又可以一齊創作，我好鍾意呢一種感覺！」
至於身為戲中唯一奸角，小野就稱冇諗過太子峰人氣咁強勁，呢晚再流利講出戲中越南話台詞，引發全場爆笑！小野仲為新年再學越南話，送祝福。
另一位獲封為「《夜王》MVP」嘅「葵芳」蔡蕙琪，被蘇師傅預言未來兩年事業將有更大突破，佢就冷靜話：「聽到當然開心，但我會保持平常心，繼續做好自己，蘇師傅仲有提醒我唔好揸車，我考咗三次車牌，第三次先至合格，所以我今年唔揸車、搭地鐵，多啲去葵芳站，我諗我運程應該會好啲！」