陳松伶 順利完成伊館演唱會，仲獲多位前輩同圈中好友捧場，松松以當年入行時參賽嘅歌曲為個唱揭開序幕，帶領觀眾重溫佢入行40年嘅精彩時光。松松亦將主唱過嘅經典劇集歌曲帶上舞台。而曾參與兒童節目嘅佢亦為觀眾送上兒歌，期間 譚玉瑛 同 麥長青 兩位當年拍檔由台下升上舞台，勾起大家唔少回憶。
松松今次邀請 張與辰 擔任音樂總監，咁難得兩人同台，松松當然要同「細佬」一齊合唱，與辰亦為大家獻唱新歌。
但係講到驚喜，一定係松松嘅「魔鬼教練」老公 張鐸 現身舞台，為太太伴舞，瞓身全力支持太太演出。松松為咗今次開騷，錯過了同老公慶祝結婚16周年，陳太陳淑芬喺慶功宴上，特別準備蛋糕送畀兩夫婦補祝結婚紀念。完成演出，松松直認心情興奮，感激觀眾朋友嘅寛容、愛同支持，令佢數度哽咽，期待不久將來再同大家見面。
