黃澤鋒同太太陳麗麗舊年8月誕下細女「小貴妃」黃熙喬，同家姐「小黃妃」黃熙恩兩姊妹相親相愛，家姐同爸爸媽媽一樣對妹妹愛不釋手，喺好多嘅照片中見到小黃妃抱住妹妹時會小心翼翼地輕輕親親妹妹，真係好溫馨。
澤鋒3月4日踏入59歲生日，自從有女萬事足後，除咗工作以外，澤鋒趕住返家做奶爸，唔想錯過兩位千金成長期，生日當然唔例外，澤鋒簡簡單單一家四口切蛋糕，喺片段中見到澤鋒抱住細女「小貴妃」，眼仔睩睩面對鏡頭，家姐「小黃妃」就坐喺妹妹側邊。
兩個寶貝女十分精靈可愛，家姐仲一齊唱生日歌親親爸爸，講一聲「嗲嗲生日快樂」勝於一切。澤鋒被身邊最愛嘅三位女性包圍喜形於色，不自覺流露一副冧爆嘅慈父樣子，「小黃妃」仲好肉緊捉住妹妹嘅手仔錫錫，呢個場面真係好有愛呀﹗
陳麗麗喺2019年以52歲誕下長女後，去年8月再以58歲高齡誕下第二胎，夫妻為組織家庭花咗極大心血，四口子幸福快樂。澤鋒成日都喺訪問透露好珍惜家庭，自己要長命百歲，盼望睇住兩女兒成長，而妹妹嘅出生亦圓咗家姐「小黃妃」嘅夢想有個妹妹，可以互相照應，相親相愛。
