劉青雲現身《第三十二屆香港電影評論學會大獎》頒奬典禮擔任頒獎嘉賓，呢一屆「最佳男演員」及「最佳女演員」奬項由古天樂、廖子妤奪得，青雲喺頒獎畀Fish時，更舉起手指公讚揚Fish。
近年香港電影圈被指進入寒冬期，青雲亦喺典禮同大家講咗一番鼓勵說話：「為咗生活，大家都要搵啲嘢支撐一下，但我覺得唔需要放低理想同夢想，正所謂『熱情若無變，那管它滄桑變化』。」
古仔喺青雲手上接過奬項心情興奮，分享得奬感受外，仲透露二人再合作嘅可能性。資深演員游飈2月底因腦出血離世，令唔少人都深感婉惜，古仔都話知道消息時覺得好突然，因為前一日先同黃文標提起游飈昔日合作嘅事。
