TVB娛樂新聞台主播王鎮泉JeoffreyWong 今個星期 繼續為觀眾送上《電影泉攻略》，介紹最新影圈資訊。唔少觀眾知道《小飛俠阿童木》呢個出自已故嘅日本漫畫之神手塚治虫先生筆下嘅經典角色，有消息指嚟緊將會開拍荷里活嘅真人版電影。
今集影人Talk邀請到新戲《犯罪101》台前幕後演員Chris Hemsworth、Halle Berry同導演Bart Layton接受專訪，分享拍攝驚險場口點滴。喺戲中Chris Hemsworth大部份動作場面親身上陣，整個團隊將呢啲演練帶到洛杉磯街頭，喺路上風馳電掣，令件事更有真實感，而拍攝呢類場口時，Chris Hemsworth要喺車與車之間穿梭，緊張到出晒汗。導演Bart Layton亦表示為咗場面逼真，特別研發咗一啲科技將攝影機藏喺意想不到嘅地方，營造出置身其中感覺。Bart Layton曾經喺戲院見到觀眾睇戲時，刺激得左閃右避，好開心見到觀眾有唔同嘅體驗。
本周電影新片速遞
《奪命狂呼7》新嘅鬼面殺手出現喺Sydney過住新生活嘅寧靜小鎮，佢心底裡最恐懼嘅事已經喺現實生活中發生！因為佢嘅女兒成為鬼面殺手下一個目標。為咗保護家人，Sydney必須再次面對佢過去嘅恐怖經歷，乾淨俐落結束無止境嘅血腥。
《日租家庭》講述一位失意美國演員Philip喺東京發展演藝事業處處碰壁，人生陷入低谷。喺迷惘中，佢意外獲得一份離奇工作，受僱於「出租家庭」公司，並根據客戶需求，去扮演一些缺席嘅人生角色。
《闇黑新娘》喺三十年代嘅芝加哥，一位孤獨嘅科學家同一位醫師，攜手將一名遭謀殺嘅女子重新喚回塵世。當「新娘」睜開眼睛嘅嗰一刻，不僅點燃咗意想不到嘅情感火花，亦引嚟警方嘅窺探同社會震動。呢場對生命嘅再造，逐漸演變成一場衝擊傳統秩序嘅革命性浪潮。
《衝鋒：火拼》講油尖旺地區發生連環搶劫案，區內多家珠寶店遭遇悍匪團嘅洗劫，喺區裡執勤嘅衝鋒隊組長鄭志斌帶領住隊員，喺鬧市裡面多次同悍匪團交手。幾次生死交鋒，鄭志斌意識到佢哋並唔係一般悍匪，而係多年前另一樁持槍搶劫案嘅在逃要犯，亦係其中一名隊員張家和嘅殺兄兇手。
《陽光女子合唱團》講獄中產下女兒芸熙嘅惠貞，係一位背負誤殺罪名嘅母親。好在獄中有一班好姐妹給予佢哋愛同支持，不過獄中其實個個都背負住傷痕同難題，於是一班破碎嘅女子，決定組成「陽光女子合唱團」，喺歌聲中縫合傷口，尋回生命嘅微光。
今個星期票房龍虎榜截至3月4日中午，第1位《夜王》、第2位《金多寶》、第3位《鏢人:風起大漠》。