「扮嘢王」李思捷歌近年與麥長青、曹永廉、黃智賢及唐文龍組成「Hey Brother」，人氣急升，思捷日前重返成長地多倫多舉行一連兩場演唱會，座無虛席，當中不乏圈中人杜麗莎、張崇基等到場支持，難得喺「樂壇教母」杜麗莎面前演出，思捷坦言有壓力！
思捷喺台上獻唱多首廣東歌，勾起多倫多粉絲嘅回憶及情懷，為入鄉隨俗，思捷亦獻唱英文歌，更穿上多倫多棒球隊波衫，以示對球隊嘅熱愛。多倫多係思捷成長地，佢受訪時話重回舊地開騷感覺親切，他又透露上次回多倫多已經係8年前，今次開騷有好多認識30多年嘅老朋友現身支持，李思捷直言：「細個讀書嘅美麗畫面，以及童年回憶都走晒出嚟。」
思捷席間貫徹「扮嘢王」作風，獻唱譚詠麟、鄭少秋、張國榮及四大天王等多首名曲，並邀請《中年好聲音2》季軍顏米羔擔任嘉賓合唱，將氣氛炒熱至最高點。
對於獲得杜麗莎及張崇基到場觀賞，思捷表示受寵若驚， 憶述17年前首次與王祖藍、阮兆祥開福祿壽演唱會時，就係由杜麗莎擔任歌唱導師，糾正當年歌藝尚未成熟嘅思捷，佢續道：「喺杜麗莎老師面前唱歌，有啲壓力！好彩我有用佢教過我嘅歌唱技巧獻唱，佢都話『今次演出OK，睇得好開心』，佢開心，我都好開心。」
適逢農曆新年，思捷喺演唱會期間獲現場粉絲狂派利是，主辦單位老闆娘更向思捷派送「銀紙扇」，絕對錫到思捷燶，對此佢亦覺得難以置信：「今次收利是真係收到手軟，而且每封唔輕手，估唔到多倫多粉咁熱情，所以我有少少唔好意思。」
問到思捷多倫多歌迷有冇催婚？思捷笑言呢類問題一定有講：「好多朋友同粉絲都叫我快啲結婚，成日都講，我都聽慣晒。我覺得順其自然，睇時機，最重要係同對方互相尊重。」談及今年大計，李思捷透露會與Hey Brother舉辦演唱會，以及搞創作及綜藝節目。
