周柏豪 入行邁向20年，呢日現身《星光路上》接受TVB娛樂新聞台主播 潘盈慧 訪問，經歷過高低起跌，柏豪自覺而家都唔錯，能夠做到自己想做嘅嘢，又有咁多人愛錫，呢19年都好開心。
柏豪相隔7年再次喺香港開騷，於白色情人節舉行音樂見面會，喺傳統演唱會架構上，再加入新嘅互動環節，場外有應援嘢可以畀大家打卡，佢解釋唔想單一係「演唱會」三個字限制咗做法。
柏豪今次以「綻放之章」為主題，佢話由男孩子去到呢個歲數，男人去到呢個歲數係綻放之年，而自己就喺呢個階段，同埋當佢做咗爸爸後，生活模式改變咗好多，呢個時刻係最開心！
柏豪笑指而家最大轉變就係早瞓咗，將小朋友送上校車，雖然柏豪一方面想小朋友學識自立，另一方面都盡可能多啲抱吓仔女，好想小朋友記得爸爸抱佢哋係咩感覺，畀一啲好嘅記憶畀小朋友。柏豪笑稱跟小朋友撞期，自己舉行音樂見面會當日，阿女要出騷跳舞。