馮德倫 Stephen 放低歌手身份超過20年，為咗自己嘅IP決定重操故業再出歌，雖然係一個特別嘅project，但Stephen絕對唔馬虎，佢話自己都會跑宣傳，仲搞笑話如果首歌有獎攞，自己都好樂意參加樂壇頒獎禮。
Stephen透露自己唔止今次出個人單曲，連佢同雷頌德嘅樂隊Dry都有計劃推出新歌，事關今年係Dry成軍30周年，所以好有紀念價值，不過Stephen就話阿Mark先係Dry嘅大佬，所以關於Dry嘅所有嘢都要聽大佬話事，唯一唔同嘅地方係而家自己有錢買衫，所以服裝方面可以自己揸主意，佢仲不忘提醒大家自己係國際大牌嘅行騷Model。
Stephen嘅太太舒淇上年升呢做導演，處女作就得到釜山影展嘅最佳導演，加上之前大大小小嘅影后獎座，屋企就嚟唔夠位擺，唔知Stephen願唔願意犧牲自己嘅Figure，讓出啲位俾太太擺獎座呢？「梗係唔願意啦！有冇搞錯啊？呢個咩交易？」
問到Stephen會唔會搵太太做MV女主角，佢就話佢哋兩公婆性格比較低調，所以最好都係分開工作好啲。
