農曆新年啱啱過，賭王千金何超蓮食咗唔少美食，唔知係咪因為咁，佢想特別關注一下消化系統嘅健康，超蓮喺3月7日就上載咗一張去醫院照胃鏡嘅相片。
相見超蓮瞓喺病床上，戴上無菌手術帽，然後嘴扁扁咁望住鏡頭，仍然不失美態，佢寫道：「腸胃鏡Done，不願想起那2公升」。超蓮所指嘅2公升應該就係指照胃鏡醫生所開嘅清腸藥，目的係排空大腸內嘅殘留物，以便醫生睇清壁，唔少網民紛紛留言表示認同啲藥好難飲，並祝願超蓮保重身體、好好休息，有網民竟然問起佢老公竇驍「怎麼不見妳老公呢」。
網民經常關注超蓮同老公嘅夫妻關係，係因為超蓮同竇驍婚後多次傳出婚變傳聞，雖然兩人喺今年一月曾合體喺上海出席活動，力證夫妻情不變，但係網民仍然咬住唔放，話佢哋「貌合神離，形同陌路」。日前何太陳婉珍72歲生日，網民又發現超蓮上載嘅家庭大合照中，又唔見竇驍蹤影，再度惹嚟揣測。
