黃凱芹（Chris）一連兩場紅館演唱會，噚日正式開鑼，黃凱芹首場演繹超過40首歌曲唱足3粒鐘，開場由黃凱芹恩師前著名DJ鄧藹霖以獨白形式揭開序幕。
講到最初以導師身份接觸黃凱芹，覺得對方好Cool，「總係覺得佢唔係好睬人，但係叫佢交功課錄啲Demo，佢又好有深度做足準備功夫，而問到佢有咩才能時，佢話幾鍾意唱歌，我叫佢錄段嚟聽吓，一聽真係驚為天人，後尾我先知原來佢讀中文大學時，已經係中大歌王」，鄧藹霖提到黃凱芹嘅Cool只係欠缺自信嘅表現，佢向對方贈言，「相信自己係最勁，喺台上係最靚仔，唱歌係最好」，以聲音導航，引領徒弟黃凱芹以歌曲《感受》出場。
黃凱芹今次歌單相當有心思，原來係除陳百強外，圈中能夠集齊顧嘉煇四大高足鍾肇峰、徐日勤、杜自持同周啟生合作嘅歌手，分別演繹跟四位音樂人合作歌曲，特別係鍾肇峰所寫、首度現場演繹嘅電視劇主題曲《劍仙李白》。演唱《情深緣淺》時，黃凱芹跟8位年輕結他手同台演出，佢爆笑指最大年紀嘅樂手只得23歲，最小更只得21歲，「我唔單止做得佢哋老竇，真係仲做得佢哋阿爺呀」。
黃凱芹事前預告會邀請電台同門師弟妹周慧敏、阮兆祥同余劍明，首度公開演繹由佢親自作曲及填詞嘅全新歌曲《數十年後》，喺演唱會尾聲合體，合唱前黃凱芹先分別同佢哋合唱一曲。合唱完後四人繼續話當年，周慧敏、阮兆祥同余劍明竟然群起大數黃凱芹好小器，余劍明投訴黃凱芹只喺半夜接載過佢一次返屋企，阮兆祥更慘到一次順風車都未坐過，但黃凱芹解釋：「嗰時喺電台收工，我住喺青衣，但余劍明住觀塘都話順路要我車喎！」
有份為《數十年後》獨白嘅電台恩師鄭丹瑞（旦哥），期間亦有一齊暢談，旦哥大爆鄰座觀眾上網查黃凱芹歲數，相當搞笑：「最好笑呢個查完黃凱芹幾多歲，隔離嗰個仲舉起手指公，不過我最想講我哋忘記幾多歲，我哋反而要好多謝黃凱芹，帶我哋今晚去返番我哋最開心、最燦爛嘅一九八幾年，我寧願我哋永遠都停留喺嗰個咁開心咁簡單年代，就好似你哋（黃凱芹、周慧敏、阮兆祥、余劍明）咁多年，友誼永遠不變，我代表大家講聲good show，多謝！」
黃凱芹喺Encore部份跟觀眾大玩卡拉OK，實行萬人大合唱《哪𥚃的天空不下雨》及《雨中的戀人們》等多首經典金曲。講到入行40年，黃凱芹形容「好似發咗場夢」咁，而綵排後有00後歌迷送上親筆信，令佢感觸良多，「咁就過咗40年，除咗有最初嘅一班粉絲之外，仲有呢啲00後嘅歌迷，老中青唔同年代嘅人都濟濟一堂，好似發咗場夢咁，觀眾有反應就係好真實感受，會令人毛管戙，作為歌手真係好滿足，或者我仲可以唱多一、兩年，但我好珍惜有呢次機會」，最後黃凱芹以歌曲《我就是我》，為演唱會劃上完美句號。
