有「御用秘書」之稱嘅何芷姍（原名：何綺雲）喺TVB處境劇《愛‧回家之開心速遞》嘅MA姐形象入屋。何芷姍除咗鍾意演戲，佢平時亦有為寵物領養平台擔任義工。
何芷姍早前佢曬出同貓貓合照：「又帶阿花去領養日，加油啊！佢個樣係搞笑啲，仲等緊對佢一見鍾情嘅人。」大家讚佢人靚心地好！
雖然何芷姍已踏入熟齡階段，不過保養得宜，何芷姍不時被網民翻摷舊相，大讚其Keep得好，根本唔似已「入五」。最近有人搵返佢19歲入行時拍《飛虎雄心》嘅片段，盛讚係「港版常盤貴子」，氣質清純，仲話喺當年已好留意佢嘅表現。
1997年入行嘅何芷姍曾喺電影《花樣年華》做過孫佳君替身，以及張曼玉燈光替身，直到2003年經模特兒公司轉介，先入讀TVB第17期訓練班轉行做演員，近年仲搞埋水晶生意升呢做老闆娘添！
