韓國男星柳演錫相隔一年再訪寶島宣傳新劇，活動當日適逢元宵節，佢入鄉隨俗第一次食湯圓。柳演錫大讚湯圓好食，亦向大家送祝福，希望大家今年可以充滿愛同幸福。
柳演錫今次喺戲中飾演一個可以見到鬼魂嘅律師，喺幫鬼魂伸冤嘅過程仲會被鬼附身。為咗投入角色，柳演錫事前做咗唔少功課，更拜訪當地傳統巫師，佢話巫師表示呢個身份同演員生活某程度係相似，仲話演員需要喺每部作品變換角色，所以演戲呢類工作同被鬼附身差唔多，自己亦可以帶更多同理心去拍攝。
劇中柳演錫被唔同身分背景嘅鬼附身，對演開斯文靚仔角色嘅佢嚟講真係好大犧牲。柳演錫覺得演繹被附身真係好有趣，今次仲要挑戰講方言、跳女團舞，佢覺得好難忘。
