王君馨擔任慧妍慈善晚會嘉賓 靠與好姊妹傾媽媽經減壓

慧妍雅集將會喺3月尾舉行44周年慈善晚會，朱凱婷第二年擔任會長，佢好開心可以藉住呢個記招，同一班成員聚首一堂呀，Heidi表示成員們個個好團結，有活動一定會幫手，梁麗翹同黃嘉雯都話樂在其中，希望晚會籌到更多善款。

呢次晚會除咗請嚟中聲唱將黃博擔任表演嘉賓之外，曾經係慧妍雅集活躍份子嘅王君馨，呢次亦將參與演出，佢都話好期待呀，希望到時大家同佢一齊跳舞，散發更多Energy！

Grace話今年除咗會努力創作新歌之外，嚟緊佢有另一個目標，就係佢喺今年母親節將會參加一個大型賽事，希望挑戰自己嘅體能。Grace早前相約好姊妹朱千雪同麥明詩，一齊敘舊兼傾吓媽媽經，Grace體會到做媽媽真係好唔容易，所以佢好感恩身邊有好多朋友關心佢，喺佢崩潰時給予幫忙，佢話因為得到朋友大大嘅支持，身心靈先可以咁健康。