趙浚承 參加《中年好聲音3》後再出道，比賽結束後人氣持續高企，演出機會更係浪接浪。好似同一眾中三生參與「有你有我演唱會」，演奏二胡又大展舞技更扮「華英雄」技驚四座，去年底又發表新歌《從你我成為我們》。
早前Gary就應邀參與全運會閉幕式同殘特奧會嘅閉幕活動，又喺澳門原創歌曲音樂會中，憑佢演唱嘅內地劇集《青春之城》嘅片尾曲《如果我有夢》奪得獎項。
Gary近月亦不時應邀參與唔同商業演出同慈善活動，又接拍多個廣告，不過踏入馬年，最令佢開心嘅就係先獲參與大年初一盛事花車匯演演出，到大年初三又同 黃劍文 及 顏米羔 參與新春金曲夜活動。Gary更即場獲主辦單位老闆點名邀請同台合唱，老闆更大讚佢前途無可限量。
雖然Gary同妻兒不時分隔兩地，不過近日佢於社交平台分享短片，驚喜透露原來太太同囝囝亮相北京衛視春晚表演，兩人歌喉更非常不俗，可以話係歌唱世家一門三傑。片段中Gary太太與囝囝同台演出，小朋友可愛又靚仔超高顏值迅即引起討論，完美遺傳父母優良基因；太太甜美外貌同樣成為焦點，Gary投入欣賞演出眼神充滿愛意。
