粵劇新貴花旦 梁非同 成立嘅「非同劇團」近日公演頭炮新編粵劇《安國紅玉》，三場演出全部爆滿之外，呢位首次擔任班主嘅新貴，亦獲多位各界前輩支持陳寶珠、汪明荃、尹飛燕、吳美英、黃德斌、謝寧、余慕蓮、劉家豪、梅小青等。
非同呢幾場演出亦不負眾望施展渾身解數，寶珠姐入後台打完氣更一直睇到謝幕先離場，仲大讚呢位後起之秀話：「Good！Good！尤其超難度抝腰臥月動作絕對唔容易，雖然戥佢辛苦，但觀眾欣賞值得高興。」 梁非同今次喺《安國紅玉》演出中盡顯刀馬旦功力，開場掛帥擊鼓一幕已令觀眾亮眼，造型扮相驚艷，武術指導韓燕明設計高難度武打動作，好似寶珠姐所講嘅抝腰臥月動作，非同身穿大扣仍然轉身抝腰幾乎貼地再躍起，贏得全場掌聲。
除咗非同獨當一面，台上另外四柱王志良、莫華敏、曉瑜冋符樹旺幾位年青中堅份子，台上表現一樣出色，型格、帥氣互相輝映。 梁非同首場向觀眾謝幕時，以班主身份感謝台前幕後嘅付出，提到伯樂施姐（彭美施）時哽咽落淚話： 「非同劇團係我藝途上嘅里程碑，不得不多謝有親如媽媽一樣嘅施姐，仲有一班前輩團，多謝大家對我嘅支援。我更希望與更多年青演員一齊，俾心機喺粵劇舞臺上繼續奮鬥。」
施姐欣賞完演出之後亦都話：「我同非同合作四年，我嘅作品都由佢演出可以詔合作無間，見證佢成長同躍進、勤奮努力進修，能夠有今日成績實在好值得支持。」
