TVB推出全新真人騷《魔音女團》，將擁有魔音嘅女藝人，透過特訓提升佢哋成為Magic Voice。日前面試吸引約半百女藝員參與。包括：梁倩萱、俞可程、鍾翠詩、游嘉欣、郭柏姸、吳芷靖、蔡華英、波波黃婧靈、倪嘉雯，等，大家一齊喺星級班主任 陳潔靈 同 陳奐仁 面前一展魔音功力。其中鍾翠詩更得到Hanjin以：「你進步空間係無限。」嚟鼓勵。
至於魔音了得嘅Rosita演唱完《喜歡你》後，竟被Miss Chan Chan直言「失望」，佢話每個人都同佢講要留意Rosita，因為Rosita嘅特殊唱功令佢有「魔音芊芊」呢個花名，但呢日聽完Rosita唱覺得問題並唔大，只係心急唱低咗音。
事後Rosita都話呢個面試比港姐面試更令人緊張，因為要考唱功、Rap功、舞功，倪嘉雯就話自己係不顧一切報名參加，因為唔想自己後悔，過咗呢次就唔知下次係幾時。
蕭正楠將擔任節目主持，佢話可能太太都係魔音代表之一，所以對魔音就情有獨鍾，而Miss Chan Chan就話，因為節目要搵一班唱歌有魔音傾向嘅女藝人做女團，而大家只有三個星期時間去改變，今次嘅任務係充滿挑戰！
Hanjin仲話Miss Chan Chan一開始表示：「唔玩。」，Miss Chan Chan都直認不諱，不過佢話，有Hanjin喺度，可能會變到魔術出嚟改變大家。