眾多藝員包括 佘詩曼 林保怡 陳自瑤 陳曉華 王敏奕 郭柏妍 蔡潔 張振朗 吳業坤 何廣沛 譚耀文等 ，現身77工作室春茗，一眾合作對手重逢場面熱鬧，連獎門人曾志偉都有嚟同大家見個面，齊齊撈起。席間由鍾澍佳帶領同演員們回顧舊年嘅佳績以及欣常賞即將推出新作嘅精華片段。
阿佘同譚耀文合作嘅新劇《正義女神》中飾演兩公婆，兩人都好期待劇集快啲同觀眾見面，但另一方面阿佘就好擔心角色會隱藏Man姐嘅影子，身邊嘅阿譚就堅定指唔似，認為有好大分別，阿佘笑言有老公嘅加持即放心晒。
講到合作嘅點滴，阿譚就爆阿佘體力驚人似奧運運動員，因為拍完劇到深夜佢都精力充沛，可以同助手去食宵夜，翌日又比自己更早開工仲非常精神。
今年一齊喺《萬千星輝頒獎典禮2025》中獲得最佳男、女配角嘅何廣沛同王敏奕，就預咗喺春茗上加碼抽獎，慰勞工作人員。而講到今個農曆新年，之前公布同圈外女友求婚成功嘅廣沛就不斷被人催派利是，佢更自爆今年會舉辦婚禮完婚，已為人妻嘅Venus更大方分享搞婚禮秘訣。
林保怡舊年喺《形偵12》中演出嘅多重人格嘅角色成熱門話題，Bowie笑言已經同佳導反映冇工作，等佢安排開工拍劇，暫時日常生活只係放狗同做運動，保持好狀態。
坤哥同老婆濱口愛子因為去旅行期間post咗關於生bb嘅神社御守相片，而獲得大量祝福，坤哥話傳佢哋有喜已經好幾次，但仲未有喜訊公布。
