全新節目《他們的澳洲駕期》下星期起就會播出，呢日有份參與呢次自駕遊嘅 黎耀祥 曹永廉 蕭正楠 仲有 吳若希 戴祖儀 同 丁子朗 一齊出席記者會，仲分享於當地同好友共處嘅旅程實況，大家仲似乎對呢次旅行非常回味。
Jinny仲提到行程不時會發生意料之外嘅事，就好似人生漫漫長路一樣，所以認為一定要有最好準備同最壞打算咁話。而雖然有人話，朋友去旅行隨時會反面收場，不過Jinny、Joey同丁丁就未有不和，感情更係有增無減，仲大爆收埋唔少內容火辣嘅靚相，收視理想就會公開喎。
至於早自《公公出宮》後就成為好友嘅祥哥、阿廉同阿蕭，今次齊齊出行兩星期，仲話完全冇當今次係拍攝，玩得非常自在，祥哥同阿蕭仲爆阿廉長氣唔識停，收埋大把八卦呀。
《他們的澳洲駕期》3月16號起 星期一至五晚 22:30 翡翠台