偶像女生 繼去年第一隊「IdG Bubbles」出道更獲得兩大樂壇新人組合嘅金獎後，第二隊女團「IdG Sundae」亦正式誕生，6位成員Helen、Melanie、圈圈、Hazel、Sharon、Renee接受電台節目訪問，談及成軍感受亦首播出道作《新新地》（SunSundae）。
佢哋仲指「IdG Sundae」名字由來同出道作《新新地》有關，Helen解釋：「呢首歌舊年8月全部IdG聽過，內容係關於甜品雪糕，主腦亞拔同我哋講，女團可以向甜品、水果同活力呢個方向，有日我突然好想食新地筒，就諗如果隊名向呢個方向都唔錯，其他隊友都好贊成，大家都鍾意Sundae咁甜美開心。」
「IdG Sundae」成為今年首隊成軍女團，而成員得知自己入選嘅情況亦各有不同，「圈圈」去年10月已被公布入選，「Melanie」就喺1月活動上得知入選，當刻即時變成天然呆，「我哋表演歌同歌中間，亞拔突然上台叫我個名，歌迷都有影低我個樣有幾呆滯，嗰刻掛住諗下首要表演嘅歌，所以係驚嚇多過驚喜。」而其餘成員同日亦收到通知要錄音試唱，6位成員集齊一刻，大家都相當興奮。
童星出身嘅Melanie提到加入IdG嘅初心：「面試前太緊張諗過放棄，畀朋友鬧我，應該抱住學習同識朋友心態。」而過往練習K-pop舞蹈嘅Helen自言對唱歌欠信心：「除咗公司安排，大家都開群組一齊抽時間練習，希望出嚟效果更好。」至於圈圈早於13、14歲已不斷向韓國公司自薦，可惜全部失敗：「我好細個已經想成為女團，呢個一直係我夢想，參加偶像女生我當係最後機會。」
而「Sharon」搞笑踢爆原來媽咪想成為星媽：「佢係由細栽培我同家姐，所以我加入咗偶像女生之後，佢仲緊張過我成日問住我哋動向。」至於本身係舞者嘅「Hazel」本有機會往韓國發展，但因學業放棄：「去韓國嗰時我啱啱考DSE，屋企人擔心會影響我成績，讀大學時有今次機會，舞團嘅朋友都鼓勵我參加。」自小已熱愛表演嘅「Renee」就決定參加IdG挑戰自己：「我跳咗9年芭蕾舞成績幾好，好想試吓其他舞種加入舞團，認識咗IdG嘅舞蹈總監，佢建議我參加。」
講到出道作品《新新地》（SunSundae），6位女孩對新作都相當喜歡，Helen聽完首播更感動到喊，阿拔受訪時表示：「唔係我幫佢哋追求夢想，反而係調轉嚟講係佢哋幫我完成夢想，因為我相信有夢想嘅小女孩，係應該有回報，好想訓練佢哋出道。」各成員聽完全部變晒喊包﹐佢仲透露「IdG Sundae」今年會再有派台歌，而IdG其他成員亦會以其他組合或形式陸續出道。