林憶蓮 嘅「迴響 RESONANCE」巡迴演唱會，去年先後於深圳、廣州、北京、上海、澳門等地演出共34場，而剛踏入馬年，憶蓮就宣佈相隔9年再於香港開唱，5月中會於啟德主場館舉行兩場演出，Sandy更同團隊製作重新構建香港特別設計專屬歌單，舉行《迴響巡迴演唱會RESONANCE : Reconstructed Hong Kong Exclusive》。
Sandy有感而發話：「9年其實過得好快。但對一個唱歌嘅人嚟講，9年足夠經歷好多成長同轉變。香港對我嚟講從來都唔止係一個城市，而係我歌唱之路嘅起點，係刻入心底嘅歸處。好多歌、好多第一次，好多珍貴嘅回憶，都係同香港一齊寫成，今次再喺香港開Show，更加係第一次踏上啟德主場館，對我嚟講，係一次最珍貴嘅重新出發。」
Sandy出道至今唱足40年，同樂迷一齊成長，佢仲話：「唱咗四十年依然可以喺香港嘅舞台，同一路陪住我、撐住我嘅你哋相聚，我覺得係一種難得嘅緣分，係一份好大嘅恩典，更是我呢40年中，最溫暖嘅幸運。」 Sandy率先披露香港站將特別設計以廣東歌作主軸歌單：「香港站會有唔同嘅編排，Rundown會因應語言同情感重新整理，亦會加入更多廣東歌。唔係單純加歌，而係希望將我對香港嘅心意揉進每一段旋律，令整體嘅節奏同氣氛，真正屬於香港，屬於每一個聽我唱歌嘅香港朋友。我一直相信，同一首歌喺唔同地方唱，都應該有唔同嘅溫度，而香港嘅舞台，一定會係最溫熱。」
除歌單有別過去其他場次，製作上亦會相對調整，Sandy續稱：「有啲歌會重新編曲，有啲段落會重新組合，因為我希望唔係複製，而係再一次為香港創作，用歌聲同香港對話。舞台對我嚟講，一直都唔係展示，而係最真誠嘅對話——同香港嘅對話，同每一位一路同行嘅你哋對話。」 演唱會舉行在即，Sandy仍盼於舞台上分享對歌唱的熱誠：「每次獻唱，我都不忘保持真誠，帶住滿心溫柔唱歌。唱咗咁多年，唔係為咗證明啲乜，其實都只係想好好唱歌，唱俾喜歡我嘅人聽，唱俾這片滋養我歌唱之路嘅香港土地聽。珍惜每一次可以同香港嘅觀眾面對面嘅機會，珍惜每一次喺香港舞台上發聲嘅時刻。如果可以喺啟德呢個新舞台，再一次專心、安靜地，為香港好好唱歌，被大家嘅溫暖包圍，就已經好足夠，好幸福。」