馮盈盈舊愛鍾文浩（Martin）雖然並非圈中人，不過近年不時以醫學專家身份亮相電視節目，鍾文浩近日進軍中環開設皮膚專科診所，馮盈盈閨密麥明詩毫不避嫌，與醫生哥哥麥明山現身到賀，大方與鍾文浩夫婦合照，新診所開張當日場面熱鬧。
相中見黃潁妍甜蜜地挽住老公鍾文浩手臂，麥明詩祝賀：「congratulations on your new chapter！」鍾文浩於2021年迎娶曾報讀TVB第17期藝員訓練班嘅黃潁妍，過住美滿婚姻生活，鍾文浩嘅社交平台帳戶頭像亦上載夫婦撐枱腳嘅恩愛合照，可見醫學界才俊非常愛妻。
鍾文浩係馮盈盈入行以嚟唯一公開承認嘅男友，馮盈盈當年曾喺TVB節目《後生仔傾吓偈》曾爆男方家境富裕，中學時期就讀名校喇沙書院，係2005年會考「十優狀元」，拔尖順利於香港大學醫學院畢業，於瑪麗醫院擔任內科醫生，2024年已係香港大學名譽臨床助理教授。
鍾文浩當年與馮盈盈愛得高調，馮盈盈入行不時將「寶寶」掛喺嘴邊，曾受訪讚鍾文浩高EQ，馮盈盈遇上工作壓力發脾氣，對方甘願做出氣袋，馮母心臟病入院，鍾文浩知女方忙開工錄節目，悉心替女方照顧母親，安排手術等，而男方以個人名義置業，馮盈盈亦瞞住家人出錢幫手付首期，合資購入何文田豪宅同居試婚，可惜戀情僅維持4年，於2019年尾告終。
馮盈盈分手後曾含淚剖白分手原因係相見好同住難，共同生活會有好大轉變，決定分開做番朋友，而鍾文浩於2021與現任太太黃潁妍結婚；黃潁妍於2017年與前度一齊投考TVB藝員訓練班，最終失敗而回，當時報稱擔任空姐工作，有傳佢婚後已辭去空姐一職。
