71歲鄔友正近年活躍喺社交平台，不時分享日常生活，又主動跟網民留言互動，日前出席77工作室春茗，巧遇多年冇見過嘅佘詩曼，鄔友正太太翁嘉穗與阿佘係1997年同屆港姐三甲，兩人卸任後時隔多年相遇，鄔友正讚阿佘完全冇老過，阿佘就讚對方保養得好好。
鄔友正日前喺社交平台以「30多年久別重逢，好震驚」為標題，分享跟阿佘合照，指阿佘多年嚟毫無變化，開心寫道：「參加TVB春茗! 好開心，遇見30多年冇見的Man姐佘詩曼！我同佘詩曼都好震驚！我好震驚佘詩曼居然同30多年前一樣，完全無老過！講話也同以前一樣！佘詩曼也震驚，話我保養得好好！原來歲月真的可以留人，真的可以返老還童！主要是要有個愉快的心！」
鄔友正笑稱喺抽獎環節被林保怡抽中，係馬年第一份獎金，佢話今年馬年係本命年運氣好，唔少網民紛紛留言大讚阿佘凍齡有術，「我記得佘詩曼跟你太太是同一屆港姐」、「阿佘Keep得好好」、「鄔先生和佘小姐樣子一樣無變」。
鄔友正旗下品牌係當年港姐贊助商之一，三人認識約30年，有網民好問「當年有冇想過出手溝（媾）阿佘，一定有」，鄔友正親自回覆：「沒有！緣份天注定！」鄔友正去年曾發文重提陳年往事，稱阿佘選港姐後第一個廣告係拍佢旗下品牌嘅枕頭廣告，當時鄔友正喺廣告自編一句「好似佢咁紅到發紫」，後嚟阿佘應驗真係紅到發紫，「可惜我錯過了！因為我的競爭對手，請了佘詩曼做代言人，而且年年續約！所以之後我再沒有機會請佘詩曼拍廣告」。
