台灣天團 五月天 每年都會重返香港開騷，而喺今年，五子就帶住佢地出道25周年巡迴演唱會升級版，將「五月之約」提早改為喺三月底同五迷「超前相約」。適逢今年係五月天成軍29周年，主辦宣布開騷日期前，網上一直有傳五子會喺3月29號開騷慶祝成軍紀念日，唔少歌迷都欣切期盼可以同五子慶祝生日，甚至喺正式售票後共同期待加場嘅出現。
主辦單位３月9號晚宣布，經重新審視香港站整體演出規劃，並喺檔期配合下，由3月24號開始嘅四場演唱會正式加入3月29日生日限定尾場，不過原定嘅頭場3月24號則取消。主辦方表示，將會為已購買3月24日場次嘅觀眾辦理退票安排，各售票平台將自行啟動退票程序，用戶無需申請退款或進行任何操作；票款及相關顧客服務費、郵遞費用（如適用），將全數原路退回至用戶購買門票的付款賬戶。
主辦單位及五月天所屬唱片公司亦特別感謝啟德體育園及各界協助同支持，令生日限定場可以成功加開，亦多謝歌迷一直支持同耐心等待，更預告喺原定嘅新編排外再加生日周驚喜，Bass手瑪莎更會為五迷帶嚟特別彩蛋！
五迷等到加開生日場當然開心，不過就有人歡喜有人愁，唔少已購買3月24號嘅本地、內地甚至海外歌迷，都對場次被取消而感到錯愕同傷心，更有人喺社交平台表示喊到入醫院，又有人不滿表示，取消一場加一場嘅做法係咪想令五月天臨休團做新碟之前，要搞到聲名狼藉？ 尤其係為五月天遠道來港嘅歌迷有唔少嘅機票、酒店都未能改期退費，大家都認為主辦單位同唱片公司應該要為取消場次向3月24號場次受影響歌迷俾出交通及住宿補償方案，或者該場歌迷有優先購買加場嘅優先權。