楊千嬅 剛踏入新一年就為樂迷推出全新單曲《回歸一塊小石頭》，千嬅指新歌承載自己入行多年來對生命嘅深刻體悟。日前佢更遠赴北京喺古樸嘅四合院舉行一場網上直播音樂會，同合作無間嘅香港演唱會團隊，一齊於紛飛白雪下，以歌聲會樂迷。
千嬅表示農曆年休息同家人迎新春，之後再同老公即興快閃飛往泰國度假，休息後就正式開始為下半年新嘅世界巡迴演唱會籌備。佢仲話：「好耐冇去過泰國，所以我好似發現新大陸咁，覺得自己超大鄉里，原來變左咁多、咁多好嘢玩、咁多好嘢食，最開心係係曼谷不斷有遇到朋友，又再不停同我食飯慶祝生日，冇諗過係曼谷都食左三個蛋糕。哈哈。」
千嬅享受完泰國之旅就飛往北京，為新歌同巡演宣傳：「由42度變零下2 度，即刻覺得自己冷縮熱脹下瘦返少少，諗都冇諗過，嘁北京遇上第一場春雪！唔係太凍但又好靚，所以好難忘，今次直播喺四合院做，成個香港演唱會團隊飛晒嚟幫手，襯埋個天落雪好有feel。咁嘅環境下唱咗新歌同三首舊歌，諗番都覺得好難忘，勁有feel 。」新歌《回歸一塊小石頭》，原來是係樂隊成員葉崇恩，於《MY TREE OF LIVE 巡迴演唱會》時，創作一段用於間場換衫嘅音樂，千嬅聽到旋律覺得非常動聽，於是決定發展成一首完整歌曲，而葉崇恩就邀請Robynn(葉中月) 一齊參與，從女性角度注入更多細膩情感。
千嬅指歌曲核心集中喺「一塊小石頭」嘅意象：「呢句『回歸一塊小石頭』好 touch 到我。所以連歌曲封面，我都係喺到疊石頭。堆砌石頭其實好有人生哲學，你係咁砌，好多時砌極都係跌晒落嚟。其實生命過程就似叠石咁，冇得plan ，慢慢向住喜愛，夢想行，大力吸多啖氣都可能要由頭砌過。我領悟到人唔好諗咁多「然後」、唔使咁執著，享受個過程，心要知道安靜，時間自然會話俾你知，最後答案。」
