蕭正楠 同 曹永廉 上年喺內地多個城市開騷，得到熱烈迴響。嚟緊4月佢哋將會去佛山開騷，今次仲會加入新力軍 馬國明 。日前佢哋去佛山宣傳，得到大批粉絲支持，場面墟冚。講到點解會邀請馬明加盟，阿廉同阿蕭就搞笑話係有不得已嘅苦衷，因為當時一大班人一齊喺佛山開工，阿廉同阿蕭正準備演唱會係「我哋諗緊第一個嘉賓應該搵邊個，馬明喺度一路聽住，唔好意思唔請佢，唯有焗住請佢。」
不過今次開騷馬明嘅身分唔再係嘉賓，而係其中一位歌手，馬明就話自己係吉祥物，咁啱今年又係馬年，真係應晒景。
今次話晒都係馬明正式嘅處男演唱會，當然要隆重其事，內容豐富之餘仲要有新鮮感，馬明就語出驚人話自己計劃「露肉」，原來佢睇咗《中年好聲音4》一眾藝員戴面具唱歌，佢話自己唔會戴面具，所以會露出塊面嘅肉，真係咁都俾佢諗到。
阿廉預告會有經典劇集嘅串燒歌，一定可以勾起大家嘅回憶，而阿蕭就話自己最期待快歌環節，因為未睇過馬明跳舞，呼籲粉絲到時一定唔好錯過。